تارىم يولۋىسى

-ئازادلىق يولىدا ئىزدىنىش

خىتاينىڭ مىللى زۇلىمىدىن قۇتۇلۇشنى ئويلىمايدىغان بىرمۇ ئۇيغۇر بولمىسا كېرەك. ئەمما تاجاۋۇزچى خىتاينىڭ كۈچ-قۇدرىتىنىڭ كۈچلۈكلىكى، شۇنداقلا بىزنىڭ نەچچە يۈز قېتىملىق چوڭ-كىچىك قارشىلىقلىرىمىزنىڭ ئۆزلۈكسىز مەغلۇب بولۇشى نۇرغۇنلىغان خىتايپەرەس مۇناپىقلارغا ئۆزىنىڭ ياشاش سەپسەتىسىنىڭ «توغرا»لىقىنى تېخىمۇ بەك بىلدۈرسە، يەنە نۇرغۇنلىغان كىشىلىرىمىزنى ئۈمىدسىزلىكنىڭ چوڭقۇر ھاڭلىرىغا ئىتتەرمەكتە. يەنە شۇنداقتىمۇ، يولنىڭ شۇنچىلىك مۈشكۈل، شۇنچىلىك ئەگرى-توقايلىقىنى بىلىپ تۇرۇپ، خەلقنىڭ ھەقىقى ھۆر-سائادىتىنى ئۆزىنىڭ بەختى، دەپ بىلىدىغان قەھرىمانلىرىمىزمۇ مىللى ئىنقىلاب سېپىمىزگە ئۆزلۈكسىز قېتىلىۋاتىدۇ.

قورقۇنچ ۋە ئەركىنلىك: مىللىي دەۋادىكى پسىخىك ساپا ئانالىزى

مەمتىمىن ئەلا

ئەگەر بىر ئادەم ياكى بىر توپ ۋە ياكى بىر مىللەت غايەت زور قورقۇنچنىڭ ئاستىدا بولسا، ئۇلارنىڭ ئىنسانىيلىقنى چىقىش قىلىپ ھەرىكەت قىلغان ياكى ئويلىغانلىقىغا ئىشەنگىلى بولمايدۇ.

                                                                                             _     بېرتراند رۇسسېل



     قورقۇنچ ئىنساننىڭ ئۆزىنىڭ قۇدرىتىدىن ياكى بىلىشى ھەم قىياسىدىن ھالقىپ كەتكەن شۇنداقلا ئۆزىنىڭ مەۋجۇتلۇقىغا قارىتا تەھلىكە شەكىللەندۈرىدىغان ئوبېكتتىن ۋەھىمە ھىس قىلىش ھىسسىياتىدۇر. قورقۇنچ بەزىدە ئادەمدە ئۆزى قورقۇۋاتقان ئوبيېكتقا ئۆچمەنلىك ھىسسىياتىنى قوزغىسا، بەزىدە ئۇنىڭدىن يىرگەندۈرىدۇ، يەنە بەزىدە بولسا ئادەم ئۇنىڭدىن قېچىشنى ئىستەيدۇ. شۇنىڭدەك، يەنە شۇنداق قورقۇنچمۇ باركى، ئۇ ئىنساننىڭ قەلبىدىن تاكى ئۇ ئۆلگىچە يۈتمەيدۇ، ئۇنى داۋاملىق ئارامسىزلاندۇرۇدۇ ۋە چىدىغۇسىز دەرىجىدە ئازابلاپ تۇرۇدۇ. دېمەك، قورقۇنچتا ئادەم بىلەن ئۇ قورقۇۋاتقان ئوبيېكت ئوتتۇرىسىدىكى مۇناسىۋەت كۆپ ھاللاردا ياتلىشىش ھالىتىدە بولىدۇ.